كتر من الفضايح

مثل قديم كانت دايما تيتة تقوله: "يارايح كتير من الفضايح" ... وده معناه انه لما يكون حد هيسيب مكان وعارفة ان هيسيبه بيعمل اللي هو عاوزه ومش خايف من حاجة ماهو سايبه سايبه

نفس المثل ينطبق علي زمرة الحكام العرب و معاونيهم علي اختلاف مناصبهم , كل الفرق انهم مش عارفين انهم سايبين اماكنهم او عارفين ومش عاوزين والحقيقة انهم مش هما اللي عاوزين يفضحوا نفسهم دي حاجة بتجيلهم من عند ربنا

وده ان شاء الله انذار من الله سبحانه وتعالي بقرب نهايتهم أجمعين.

كانوا زمان يقولوا "اللي ساتره ربه ما نفضحوش" .. طيب واللي ربنا فاضحه؟ نعمل فيه ايه؟

الحقيقة انه حصار غزة فعلا عملية تمحيص (غربلة بالبلدي يعني ) ... بين الكاذب والخاين وفضح العملاء

علشان بس مايكونش فيه لبس ... وكل الكلام اللي اتقال قبل كده عن حماس وغيرها من الشرفاء يفضح كذبه والناس تعرف من علي حق ومين علي باطل

الفضيحة الأولي كانت من نصيب

شيخ الأزعــ (ـهـ)ـــر

كل الناس شافت صورته مع سفاح قانا (بيريز) وهو بيسلم عليه كأنه بيسلم علي واحد صاحبه عزيز عليه جدا

بيسلم بحرارة وبايديه الاتنين ويقول انه الأزهر مفتوح لكل الناس حتي بيريز وكأن الأزهر ده بيت العيلة اللي ورثه عن المرحوم وبيستقبل فيه اللي هو عاوزه

وبعد كده يرجع يقول ماعرفوش ...؟؟؟ بصراحة شئ مستفز سواء كان صادق أو كاذب

لو كان صادق وفعلا ما يعرفوش يبقي احنا عندنا أجهل شيخ أزهر عرفه التاريخ

ولو كان كاذب يبقي عندنا شيخ أزهر كذاب وكلنا عارفين انه المؤمن "لا يكذب لا يكذب لا يكذب"... وده ما يصحش أبدا يكون شيخ أزهر

ويتمادي في تخاريفه ويقول أنا مجرد موظف في الدولة؟؟؟؟؟؟؟

موظف؟ من يوم ما بني الأزهر واحنا عارفين انه سلطة عالم الأزهر لازم تكون أعلي من سلطة الحاكم ولازم كلمته تكون مسموعة مش مجرد (لعبة) في ايد السياسيين

ممكن أسأل سؤال؟ هو كان رايح بصفته ايه؟ "شيخ الأزهر"؟

طيب مش ده يعني (رجل دين)؟؟

ايه اللي دخل بقي الدين في السياسة؟؟؟؟؟؟؟؟؟؟؟
وايه صفة بيريز السفاح في حوار الأديان مع ان كل الاديان بريئة منه ومن أمثاله؟
وده شئ لازم يؤكد عليه الشيخ المحترم المبجل

كلمة في ودنك بقي : (جاتك 60 خيبة علي خيبتك علشان يبقوا 61)؟

أكيد أنا مش فرحانه ولا هموت من الانبساط وأنا بتكلم عنه بالطريقة دي

أنا ماقدرش اتكلم عن " مشيخة الأزهر " بالطريقة دي لكن أنا بتكلم علي الشخص ده اللي بصراحة مالوش ذرة احترام جوايا ولو شوفته يمكن ارزعه علقة والله مش بعيد

اللي عمله مش هين ابدا

اذا كان بيحب اليهود أوي كده يروح يحبهم بعيد عننا مش باسم الأزهر كفاية اللي حصل للأزهر بسببه هو وأمثاله

ولو عنده ذرة كرامة (مع اني أشك) يسيب المنصب ده لحد يستاهله مع انه في ظل النظام الحالي الأزهر عمره ما هيتصلح حاله

_________________

أما الشخص التاني فهو:

"فضيلة المفتي"

فضيلة المفتي أفتي بأن "غرة أولي بالأضحية " ... شئ جميييييل جدا ماحدش يقدر ينكره عليه

لكن الأضحية هتوصل ازاي يا فضيلة المفتي؟ اذا كان نظامكم المبجل قافل المعبر ومانع أي حد يدخل أو يخرج

ليه ما سمعناش فتوي بتحريم تجويع المسلمين؟ ليه ماسمعناش فتوي بتحريم منع الحجاج من الحج؟ تلات آلاف حاج منعوا من الحج وماسمعناش صوتكم الكريم؟ حتي الأضحية لو الناس هيبعتوها لمجاهدي غزة (كل شعب غزة مجاهدين)هيبعتوها ازاي والمعبر مغلق؟

أعتقد أنها فتوي مفرغة من معناها تنتمي لفئة فتاوي قش الأرز

كل هدفها انها جزء من الحملة الاعلامية المضللة اللي قايم بيها النظام علشان ينيم الناس

كلمة أخيرة للشخصين السابقين

قال رسول الله صلي الله عليه وسلم " إذا رأيتم العالم يتردد على بيت الحاكم فاشهدوا بفسقه "!!!!؟

وأنا أشهد أشهد أشهد

__________

قال الرسول صلى الله عليه وسلم: "لأن يطعن أحدكم في رأسه بمخيط من حديد حتى يسيل دمًا خير له من أن تمس يده يد امرأة لا تحل له".

*ربما لم يرقي الي علمكم