إيه ده؟ مين دي؟

والله أنا .. تخيلوا؟

بس بصراحة مش مستوعبه !!!!!!!!!؟

دخلت صفحة المدونة علي موقع عمرانية وبدأت اتصفح البوستات القديمة كلها

وفجأة؟ ايه ده؟ انا اللي كتبت الحاجات دي؟ايه العقل الل نزل عليا ده؟

ماشاء الله عليا دا انا كنت عاقلة وبكتب كلام عاقل .. مع العلم باني لما كنت بكتب الحاجات دي كنت بحسها تافهة وعبيطة

لما التافه العبيط يبقي كلام كبير بالنسبة للي بيكتب الوقتي يبقي اللي بيكتب الوقتي ايه؟

حقيقي حسيت انه مش انا دي .. دي حد تاني

صحيح ماكانش كله كلام عاقل .. كان فيه حاجات فظيييييييعة كنت كتبتها وبعدين عملتها درافت .. كلام عبيط كده

بس كان فيه حاجات عاقلة بتفلت كده ساعات

المهم؟

هل فيه فعلا بوست أهبل وبوست عاقل؟

يعني لما أكتب بوست أعبر فيه عن اي حاجة بحسها سواء كنت هطق من الغيظ او هفرقع من السعادة يبقي بوست عبيط؟

ممكن الحاجات القديمة دي تبقي مهمة في وقتها وكمان الحاجات بتاعة الايام دي مهمة في وقتها

تماما زي الاحلام

هل فيه حلم ساذج؟

يعني احنا مثلا او اي حد عايش لفكرة معينة بتكون كل أحلامه مرتبطة الفكرة بتاعته

طيب لما تبقي حاجة بسيطة جدا بيحلم بيها ومالهاش اي علاقة بالفكرة

يعني انا مثلا فيه حاجة بجد امووووووت واعملها ومش متوفرة الوقتي

ومالهاش اي علاقة بفكرتي . ومش هتضيف اي حاجة للدنيا غير انها هتسعدني بجد

ممكن تخليني اسعد واحدة في الدنيا .. لا ده أكيد

بس مش هتحقق اي حاجة مباشرة في جانب هدفي او فكرتي

تبقي كده ساذجة؟

بصوا بقي البوست ده حاجة كده اي كلام

وبقالي كتير ماكتبتش حاجة وعندي رغبة ملحة في الكتابة

وهقعد اكتب حاجات مالهاش علاقة ببعض

انا بقول قبل ما تكملوا اللي عنده استعداد يكمل يتفضل

اللي مش عنده بلاش يضيع وقت علشان مش هيستفيد حاجة

وماحدش يسأل ايه اللي حصلي

ده ممكن يكون انتعاش بسبب الجو البارد والمطر

أنا اصلا بموووووووت في البرد والمطر

بحب أوي البرد والكابتشينو مع بعض ولو الحالة متدهورة بيبقي كوفي ميكس علشان كتير مش بلاقي الكابتشينو اللي بحبه

هو انا كده بحب الحاجات النادرة

أوقات بحس ان انا بحب كل الحاجات اللي في الدنيا

بحب البرد والحر والشروق الغروب والليل والنهار

بحب البرد والمطر والكابتشينو والروب التقيل وانا واقفة فوق بيتنا في النهار او وقت الشروق واشوف العصافير والطيور وهي بتطير وشكلها حلو اوي , وبحب الغراب الغتيت اللي بييجي يطاردهم ويفركشهم هو ممكن يكون بيخوفهم وبكرهه علشان كده بس في نفس الوقت بيعمل جو وحركة

وبحب الصيف والايس كريم والمانجا وانا واقفه فوق بيتنا في الليل وبشوف البومة اللي واقفة ع الشجرة الكبيرة جنب البيت

الناس بتتشائم من البومة بس انا بحبها علشان بتحب السهر زيي وبتقف معايا بالليل لما كل الناس بتنام

وبحب أكون لوحدي كمان بس هي لما بتكون معايا مش بتتكلم وبحبها علشان كده

بحب الشمس في اول شروقها وبحب أول شعاع ليها ع الارض بتحسسني بالتفاؤل والحيوية وبتخليني احب كل حاجة حواليا

بحب اشوفها وانا بسمع أناشيد رتمها سريع وايقاعها عالي

وبحب اشوفها في الغروب واسمع اناشيد هادية

وبحب كل الاناشيد بس مش بحب المنشدين المايعين

وبحب مكان جميل أوي ليه علاقة بالحلم اللي فوق وبتمني ازوره واعيش فيه بس فترة بسيطة علشان ارجع لفكرتي مرة تانية

هو مكان بعيد شوية بس جميل جدا جدا جدا

مكان بقرا عنه في الروايات والقصائد وبغمض عنيا واشوف نفسي هناك

الايام دي حاسة اني متفائلة جدا مش عارفة ليه

حاسة اني بحب كل الناس وكل حاجة حوالي ... وشايفة كل شئ جميل وصافي ومتفائل

مش عارفة ليه بس هو كده

وحاسة اني عاوزة اكتب حاجات كتيــــــــــر اوي

بس كمان حاسة اني صدعتكم

بصراحة بحب اصدعكم

ماحدش قالكم تكملوا انا حذرتكم

سامعة حد بيقول واحنا مالنا بكل اللي انت كاتباه

هقوله ماحدش قالك تقرا اصلا

هههههههههههههههههه

مش عارفة اذا كان ده ينتمي لمجموعة الموضوعات العبيطة

بس عارفة ومتأكده ان دي انا .. علي الاقل الايام دي :)

ندوة ... لمن؟

كالعادة .. تستقبل أسرة (الوفاء) أعضاء هيئة التدريس بالتهنئة بالفصل الدراسي الجديد .. وبم ان أحداثا كأحداث غزة الأخيرة لا يجب أن تمر دون الوقوف عليها.. كنا نتحدث مع الأساتذة عنها . دخلنا لأحد اساتذة قسم الاجتماع فقال " علي فكرة أنا مدافع جميل جدا عن الشعب الفلسطيني وليس قياداته .. مش حماس اللي متخبية في الجحور ولا فتح اللي بتنهب بالملايين ومستنيين فلوس الاعمار علشان ينهبوها وبيتخانقوا مين يعمر علشان يسرقوا الفلوس ....... علي فكرة عندي بكرة ندوة في مركز الاعلام الساعة 10 عن فن التفاوض ودرجة نجاح المفاوضات المصرية لحل القضية" .. لم نشأ أن نجادله كثيرا خاصة وأننا ندرك توجهاته

وبعد أن خرجنا قلت لاحدي اخواتنا "وليه مانحضرش .. خاصة انه بيقول انها لشباب الأحزاب والطلبة" .. فعادت مرة أخري للاستفسار عن الموعد والمكان

وفي اليوم التالي توجهت واحدي أخواتنا الي المكان .. وبالرغم من أننا لم نكن نعلم المكان الا أن الأستاذة أروي - حبيبة قلبي- أنقذتنا بم انها طالبة بقسم الاعلام

المهم وبعد نصف ساعة من البحث وصلنا

اتضح كل شئ من النظرة الأولي للمكان .. فالقاعة لم يكن بها أكثر من عشرين شخصا .. ثلثيهم من موظفي المركز .. ولم يكن هناك طلاب ولا حتي شباب اللهم الا بعض الفتيات لا أعلم من أين أتين......؟

وقفنا بباب القاعة للاستئذان فأشار الينا أحد الجالسين علي المنصة لندخل

جلسنا نستمع .. وكان نفس الأستاذ الذي قابلناه بالأمس هو المتحدث ... فأنصتنا فاذا الحديث عن فن التفاوض كما أخبرنا

كانت الحاضرة مفيدة الي حد بعيد .. وتعلمت منها الكثير

ولكن !!!!!!!!!!!!!!!

حينما بدأ في ضرب بعض الأمثلة بدأ يناقض نفسه

فبعد أن كان يتحدث عن أن: "قوة الدولة في المفاوضات لا تعتمد علي تاريخها أو عدد سكانها أو مساحتها وانما علي قوتها الاقتصادية والعسكرية"  ولكن حينما جري الحديث عن قطر بدأ يقول " قطر دي أصلا قناة وطلعلها دولة .. ايه قطر دي كمان علشان تعمل قمة ولا مؤتمر .. ولا ولا ولا ..... دي أصلا مساحتها تساوي مساحة أحد أحياء الزقازيق .. "؟

فسألته الأخت التي رافقتني:

" حضرتك بتقول قطر قناة وطلعلها دولة مشيرا الي قناة الجزيرة ... والي أن قطر مجرد دولة صغيرة لا تاريخ لها ..طيب احنا دولة كبيرة مساحة سكان وتاريخ .. ليه مش عندنا قناة تضاهي الجزيرة .. كام واحد في العلم بيشوف قناة النيل للاخبار"؟

فجري حديثة عن الجزيرة وكيف تعزز الانقسام بين العرب والمسلمين وأنها تستخدم د. يوسف القرضاوي لذلك , وأنها تعزز الفتنة بين السنة والشيعة, بالرغم من أنه هو نفسه حينما ذكرت ايران (الشيعية) بدأ يتحدث عن أطماعها في المنطقة وأطماع تركيا وأنها تريد اعادة السلطة العثمانية في المنطقة .. وكيف أنهما يخططان لاقتسام غنيمة الشرق الأوسط اذا وقع في ايديهما

فسألته:

" ولكن قطر نجحت في دعم الاتفاق بين الفرقاء اللبنانيين بينما فشلت مصر علي مدار ثلاثة سنوات في ايجاد حل للمشكلة بين الفلسطينيين"

فنعت الأخت بأنها "من أنصاف المثقفين المنبهرين بقناة الجزيرة المؤججة للفتنة"؟

ولم يعطها فرصة للرد

وانطلق مرة أخري يسئ الي ايران وقطر وتركيا

وأنا أستطيع أن المح في حديثه هو نارا للفتنة مشتعلة

ثم تمادي قائلا :"مصر تعيش الآن فقيرة لأنها بنت دولا عربية ولازالت تبني" ..."والفلسطينيون يعيشون في رفاهية ولكنهم يعرضون صور الدمار في الأحياء القليلة التي دمرت لابتزاز الرأي العام العالمي"؟

ثم انتقل للحديث عن الفصائل الفلسطينية مكررا حديث البارحة

فسألت:

"حضرتك وضعت كل الفصائل في كفة واحد .. بالرغم من انقسامهم لفريق مفاوض وفريق مقاوم ... والفريق المقاوم هو اللي ليه شعبية أكتر والناس بالرغم من الدمار برضه عاوزاه . حتي ان المقاومة وحدت جميع الصفوف .. حتي أعضاء فتح الانتفاضة وبعض من شهداء الاقصي التابعة لفتح ... وكمان حضرتك قولت انه حماس منتظرة أموال الاعمار لسرقتها .. بالرغم من ان د. مصطفي الفقي اعترف بان حماس ليس بها فساد بالرغم من عدائه الواضح لحماس"

فكان الجواب

"بصي يا بنتي .. أنا هقولك كلام مش هيعجبك .. كل الفصائل الفلسطينية واحد وكلهم بيتاجروا بالقضية لمصالحهم .. ود. مصطفي الفقي أستاذنا كلنا .. رجل سياسي محنك لازن يستخدم النفاق السياسي من أجل انجاح المفاوضات"؟

فقلت:

"بم ان كل الفصائل فاسدة وبتتاجر بالقضية .. مين هيحكم الشعب الفلسطيني؟ . واذا كنا ندافع عن الشعب الفلسطيني لماذا لا نحترم ارادته .. الشعب الفلسطيني ليس شعبا قاصرا لنفرض عليه من يحكمه .. واذا كان اختياره لحماس والمقاومة .. لماذا لا نعطي الفصيل المقاوم حقه في فرصة كاملة كما أعطينا المفاوض فرصة وفشل علي مدار أعوام وأعوام وفشل ... "؟

فقال

"حماس أخدت فرصة كبيرة"

قلت"

أين هذه الفرصة فمنذ أن تولت الحكم انقلب عليها القريب والبعيد وبعد الحسم العسكري في غزة الحصار ثم القصف الأخير ثم الحصار"

قال

"حماس تؤدي الدور منوط بها من قبل ايران .. ولم لن تصلح وأخدت فرصتها ....... وكمان الاخوان آداة في ايد ايران ... والسلام عليكم ورحمة الله وبركاته

قالها خاطفة وخرج .. حتي لا يجد ردا أو معارضة

وهنا أجده قد ناقض حديثه عن أفتاض حسن النية في الآخر وتقبل الرأي الآخر حينما قال

"حماس ..... خطأ خطأ خطأ وتصر علي رأيها الخطأ"

----------------

بالطبع لم يكن الهدف من ذهابنا احراج الأستاذ أو مجادلته

ولكنه أخبرنا أن الحضور مجموعة من الشباب والطلاب فذهبنا لتوضيح وجهة نظر معينة ..

ولنوضح أن هناك وجهة نظر أخري يجب الاستماع اليها

حتي لا نتعود علي أن نصفق ونهلل للمتحدث وفقط .. كما فعل الحضور الذين هاجمونا بشدة حينما كنا نتحدث

----------------

خرجنا من المركز واستقلينا سيارة أجرة .. وأخذنا في الحديث عن هذا التناقض الغريب في حديث الأستاذ ,, وكيف أنه يدعي نجاح الوساطة المصرية وغير ذلك

ففوجئنا بسائق التاكسي يقول " مصر مين اللي نجحت؟؟ مصر خايفة من حماس علشان من الاخوان .. وخايفة تسيبها تعمل حكومة تنجح تقوم تمتد لمصر كمان والتجربة تنجح في مصر زي ما نجحت في فلسطين .. أنا مش عارف هما ليه خايفين من الاخوان.؟ كان عملهم ايه د. محمد مرسي علشان يزوروا الانتخابات ويخرجوه من المجلس؟الراجل مكتبه في الشارع أهوه أدام كل الناس ما بيعمل حاجة غلط؟ ؟... الاخوان عاوزين يصلحوا بس احنا اللي شعب جبان طول عمرنا" ؟؟؟؟؟؟؟؟؟

وصلنا لان سواق التاكسي بيفهم أكتر من الدكتور!!!!!!!!!!!!!!!!!!!!؟

-

ربما أكون قد شعرت بالندم لأنني قد ضيعت بعض الوقت في مثل هذه الندوة التي لو وصفتها بالفشل لكنت أحابيها كثيرا

ولكنني أيضا أنه لابد وأن يوجد من يدافع عن أهل الحق في عقر دار الباطل

حتي وان كنت لا استحق هذا الشرف .. ولكنهم يستحقون أن يدافع الله عنهم ,, ولذا أشعر بأن الله قد ساقنا الي هناك ليخترق الحق الآذان الصم حتي وان لم أكن قد أجدت في الدفاع نه واعلانه كاملا .. بسبب التشويش وعدم اعطائنا الفرصة الكاملة

ولكنني شعرت أن الأمل ربما ليس فيمن يدعون أنهم مثقفون وينعتون غيرهم بأنصاف المثقفين

ولكنه في العامة من الناس

كالسائق مثلا


------------


والسؤال .. لمن تعقد هذه الندوات؟

البنا ... ذكري إحياء أمة

لكم نفتقدك أيها البنــــــــــــاء

التدوينة السوداء

ياتري نقدر؟

سعودي يتبرع باحدي عينيه للطفل "لؤي" الذي أصيبت عيناه في غزة
.............

.............................

عند الدقيقة 1:19 تسمع صوت الرجل

لما فكرت فيها لقيتها ... صعبة .. صعبة .. صعبة ... صعبة بدرجة ماتتوصفش

فيه حد يقدر يضحي بعينه؟

سألت نفسي السؤال ده ... وماقدرتش حتي أفكر في الإجابة

رجل سعودي يتبرع باحدي عينيه للطفل لؤي الذي أصيب في غزة !!!!!!!!!!!؟

يمكن مش صعبه عليه انه يوهب عين من عينيه

احنا اللي دايما بنهتف بالروح بالدم نفديكي يا غزة

ودي مجرد عين .. عين واحدة .. مش عمر كامل .. مش حياة بأكملها

أبكاني صوت الرجل وهو بيقولها

ياتري البكاء ده تأثر بكرم الرجل وعظم تضحيته؟ ولا بكاء علي نفسي؟

مش عارفة

بس هي صعبة ... مش بسيطة بساطة الهتاف اللي بنردده

اللهم انا نسألك الصدق

الفاروق VS. المحروق

يحكي أنه إبان حكم الدولة المنوفية لجمهورية أنتيكا الملكية سأل حاكم المملكة المبارك الرجل الشريف رئيس مجلس شوراه

ـ من الأفضل أنا أم عبد الناصر .... (باين كده عبد الناصر ده أحد الحكام المأنتكين للمكلة) .....؟

فقال لهوووووووو : "عبد الناصر مين ده ؟ ده كان بيخاف من روسيا

فسألهووووووووو:  طيب .... مين أحسن أنا ولا السادات .... (طبعا واضح انه ده كمان واحد انتيكة تاني)...؟

فقال : "سادات مين؟ ده كان بيخاف من أمريكا

ويبدو أن الأنتكة* أخدت حقها مع الراجل

فقال: كويس جدا ... مين أحسن بقي أنا ولا عمر بن الخطاب؟ . ...... (وعمرو بن الخطاب هو ثاني خلفاء المسلمين في عصور ماقبل الأنتكة*)...؟

فرد الشريف : أنت طبعا ... عمر بن الخطاب بيخاف ربنا ..... انت ما بتخافش!!!!!!!!!!!!!!!!!!؟

...................................................................

كنت بسمع أنشودة لا تدمعي يا غالية عن حصار غزة ... فيها جملة بتقول "وين الفاروق يشوفك ييجي ع كتفه الزاد" ... افتكرت خبر كنت قرأته شركة مصرية تقدم الغذاء للجنود الصهاينة ..... يبقي مين أحسن؟

-------------------------------------
الأنتكة في لسان العرب : الخيبة التقيلة ... بعيد عنكم

Mr. Know-it-all

أكتر شخصية ممكن تنرفزني في حياتي

دي شخصية كنا درسناها في مسرحية , حاجة كده زي أبو العريف

دايما بفتكرها في مواقف معينة , منها مثلا لما تتكلم كلمة وتتفهم كلمة تانية

يعني تتكلم مع حد وتلاقيه بيبحث فيما وراء الكلمة

وكانه مخرج واقف خلف الكاميرا في الكواليس شايف كل حاجة , شايف اللي المتحدث نفسه مش شايفة

يعني ممكن أكتب بوست أصحي الصبح الاقيه بقي 60 حكاية ولا واحدة فهم صح !!!!!!!؟

لا والغريب انه ممكن الاقي ناس زعلت

طيب زعلانين من ايه ؟وعلي أي أساس؟

وكأن الناس بقت عايشة في دماغي وعارفين اللي هقوله

وكل الناس فاهمة وأنا الوحيدة اللي مش فاهمة الكلام اللي أنا قولته

أقصد

انه مش دايما بنكون فاهمين الناس عاوزة تقول ايه

ده حتي في مهارات الاتصال في مهارات الاستماع تحديدا في شخصية اسمها

verbal transpasser

ده اللي كل لما تتكلم يكمل الجملة قبل ما تكملها , زي لما تكون بتقول نكتة وييجي حد رخم يكملها

وده أحد الانماط اللي يجب تجنبها ليكون الفرد مستمع جيد

ياريت بجد لما نقرأ كلام أي حد نفهم كلامه زي ماهو مكتوب , لما نسمع حد نديله فرصة يكمل كلامه وبعدين نعلق

بلاش رخامة :)

مش لازم كل كلمة نعمل عليها حكاية , أصل هضرب بعد كده

:P