الا قليلا

"وما أوتيتم من العلم الا قليلا"

سبحان الله

كل اللي العلم وصله بالنسبة لعلم الله ولا شئ , الناس طلعت القمر واسرائيل وامريكا في طريقهم لاحتلاله , ولازال ما أوتينا من العلم قليل جدا جدا لا يساوي مثقال ذرة

لما بشوف الأخبار ـ مثلا ـ مع العائلة الكريمة, وبيكون فيه متحدث أجنبي ومافيش ترجمة, لو الكلام انجليزي الحمد لله بفهمه ولما يكون فرنسي غالبا بيطير نصه تقريبا لكن بقدر استوعب الرسالة لو ايطالي آخري كلمتين تلاتة ولو عبري هما هما الكلمتين , أما بقي لو صيني أو ياباني أوي اي حاجة تانية بكون زيي زي الأنتريه اللي قاعدة عليه, ولا فاهمة حاجة

وقتها تظهر نظرات التشفي :)) من العائلة الكريمة التي عادة ما أتولي الترجمة لهم في الانجليزي والفرنسي

وقتها بيفرحوا فيها جدا ويقولوا "هههههههه ... كده فيه مساواة" ...ـ

حينها .. أتذكر هذه الآية الكريمة

أنا لو قضيت طول عمري أدرس كل لغات العالم .. هل هقدر اتعلمها كلها؟

أحيانا بحس برغبة غير عادية في اني أفهم في كل حاجة في الدنيا

أكون عارفة تاريخ العالم كله من أوله لآخره

أفهم كل ما يتعلق بالسياسة

أتقن علم الاجتماع وعلم النفس والتنمية البشرية والموارد البشرية

بكون عاوزة أعرف كل بلد وازورها واعرف كل حاجة عنها

كل حاجة في الدنيا عاوزة افهمها خاصة اللغات والسياسة والموارد البشرية و التاريخ والتنمية البشرية

لكن مهما قرأت ومهما درست ولو قضيت كل عمري دراسة ما اعتقدش هتقن كل العلوم دي في وقت واحد

أعتقد انه لا عندي وقت ـ عمرـ ولا عقل يستوعب كل ده في نفس الوقت

وحين أفكر في أنني لن استطيع .... أحط دماغي في كتب الأدب الانجليزي والانجليزي العتيق اللي أعتقد ماحدش بيستعمله الوقتي ومسرحيات شكسبير اللي مش بطيقها واللي بتعملي عقد وكلاكيع وشيزوفرانيا

ناس كتير ممكن تدافع عن شكسبير وبتحبه , ياجماعة لو بتحبوه اشربوه ,, اقصد يعني اقرؤوه لانكم لو بتذاكروه ولا هتعبروه

أنا بحب البساطة والاسلوب السلس مش العقد والكلاكيع

وقتها ,, ارفع ايدي للسما واقول يااااااااااااااااااارب أتخرج وارتاح بقي من اللاتعليم ده

  حاسة اننا بندرس حاجات محنطة , خاصة بعد المنحة اللي حسينا بعدها اننا كنا بندرس انجليزي فيومي

واللي جربنا فيها الدراسة اللي تؤهلنا للعمل ,, مش دراسة المتاحف

يللا ربنا يتوب علينا بقي كلها شهرين ان شاء الله

:)

وبعدين أقول

يااااااااااااااارب علمني ما ينفعني وارزقني العمل بيه

آمين

ما اعتقدش حد ممكن يعرف كل حاجة في الدنيا

لكن ممكن نتقن شئ واحد .. ونكتفي بالقراءة عن أشياء أخري

ده طبعا بم اني تولدت عندي حالة من الشغف بالقراءة

بعد ماكنت بكرهها

:)

---------

عرفت انه المدون محمد عادل خرج خلاص

ألف مبروووووووووووووك

ويارب عقبال كل اخواننا