زحمة يا مصر زحمة

الزحمة ...... ثقافة أم سوء تخطيط

الزحمة اصبحت عادة يومية . كل مكان فيه زحمة

من أول ما تخرج من البيت الصبح تلاقي الفرن اللي في اول الشارع والطوابير

مرورا بالمواصلات الصبح خاصة لو في بلد زينا في الطريق ومافيش موقف

ويبقي الخيار المتاح يا اما تتبهدل وتروح واقف في ميني باص عبارة عن علبة سردين

يا اما ميكروباص 4 في الكرسي وبرضو زي علبة السردين

يا اما بقي لو حد كرامته بتوجعه شويتين من الحاجات دي

يا يصحي زي الشطور الامور كده الساعة 5 وينزل من البيت 6:30علشان يلاقي مواصلات تصلح للاستخدام الادمي

وبكده يوصل الكلية 7:30 ويقعد بقي بكرامة كده يستني المحاضرة ساعة او اتنين

ويبقي يخلي كرامته تنفعه

يا اما ينزل زي الباشا الساعة 9:30 وتفوت عليه أول محاضرة

وفي الحالة دي كمان يبقي يخلي كرامته تنفعه

كمان الزحمة علي بوابة الجامعة ناس كتييييييييير جدا داخلة في نفس ذات الوقت

وياريتنا بندخل باحترام

لا .. لازم الدفع يشتغل .. ومن غير ما تحس تلاقي نفسك جوه الجامعة من غير ما تكلف نفسك وتمشي علي رجليك

اول مشهد تقع عينك عليه بني أدمين كتير اوي واقفين منتظرين المحاضرات

في انتظار ان بأتي الوقت المنشود الذي تفتح فيه بوابة المبني

وعينك ما تشوفه الا النور

الناس بتدخل بهمجية فظييييييييييييعة

وكأن الدنيا هتطير

تحس انك بتنكمش من كتر دفع الناس ليك .. وحذار تحاول تقف في طريقهم

مش هيدوك اي فرصة للوقوف .. وفجأة تلاقي نفسك جوة المبني من حيث لاتدري ولا تحتسب

المشهد أمام القاعات مهيييييييييب

خلق كتييييير اوي كلهم واقفين بس العامل اللي معاه المفتاح يظهر

واول لما ييجي تلاقيهم واقفين وراه أمم لدرجة انه مش باين منهم

اول لما يفتح الباب تبص تلاقي الراجل الغلبان بقي جوة القاعة ومش عارف يخرج يا عيني

ويبدأ التدافع علي الاماكن في الصفوف الأولي

واحيانا بتوصل لعلو الصوت و التشابك بالايدي والكتب والكراسات

وطبعا مع تلك الاعداد الغفيرة مش كل الناس بتتمكن من الجلوس فلابد من صفي التشريفة عن اليمين والشمال

وأحيانا الناس بتتعب وتقعد علي الارض

_فاصل مع المحاضرة_

لحظة الخروج .. لحظة في منتهي الصعوبة

المشهد اللي فات كان فيه دفعة واحدة بس داخلة

اما المشهد ده ... دفعة خارجة ودفعة داخلة من نفس ذات الباب

والدفعة الشاطرة أوي اللي تقدر تتغلب علي التانية

ولكم أن تتخيلوا هذا الصراع العنيف

في نهاية اليوم لو هتبدأ ترجع بيتكم من 1:30 لـ 4:00 أنصحك ما تروحش

قبل كده او بعد كده ممكن جدا تقرر انك تروح

ولو قبل كده ممكن تضطر تسيب محاضرة او اتنين

ولو بعد كده شوف بقي مكان اقعد فيه اعمل اي حاجة

وبرضو خلي كرامتك تنفعك

أما لو انت بتحب المجازفة فممكن جدا ترجع في الوقت ده وانت ونصيبك

طبعا في الوقت ده الانتظار خارج الموقف

أي ميكروباص ييجي تلاقي الناس بتجري عليه أمم

ولو حظك انه وقف امامك يبقي هتلاقي نفسك تلقائيا اترميت جوة من غير ما تحس

أما عن الوضع جوة فحدث ولا حرج

ممكن ناس تتخانق ع الاماكن وممكن تلاقي 4 بس اللي جوة بس حاجزين المكان لـ 150 بني أدم

ناس بكرامتها تنزل وناس تانية تتخانق وتقعد غصبا وعدوانا

ويبقوا يخلوا كرامتهم تنفعهم

ده الحال كل يوم

زحمة من اول ما تخرج من البيت لحد ما ترجع

لكن السؤال

هل فعلا الزحمة والتدافع والصوت العالي اصبحت ثقافتنا

وانه حتي مع التخطيط هتفضل الهمجية هي هي

ولا سوء التخطيط او انعدامه هو اللي ولد الصورة دي؟