بالطبع لست في حاجة الي التعريف بقدر الأم
أو دورها أو حتي حقها
وكل الحب والتقدير لأمهاتنا
وأسأل الله العلي القدير أن يرزقنا جميعا بر أمهاتنا و رضاهن
لكن حديثي الآن عن أنماط مختلفة من الأمهات
ولكني لا أتحدث عن أمهاتنا
يمكنني القول أنني أتحدث عن
"أمهات آخر زمن"
كثير من الأشياء لحظتها في بعض الأمهات اليوم
و أنماط عجيبة منهن انتشرت
وبالرغم من أن بعض هذه الصفات كان موجودا من قبل
في كثير من الأمهات
الا أنه اليوم وجد بشكل مستفز
ومن هذه الانماط -علي سبيل المثال لا الحصر
:::
أم بلا شخصية
الأمهات من هذا النوع مافيش علس لسانهم غير
" بس لما بابا ييجي"
مهما أخطأ الطفل مالهاش أي رد فعل
مافيش غير الكلمة دي
والخطأ في النوع ده من الأمهات
أولا: أنه الطفل من صغره بيدرك إن أمه بلا شخصية وإنه مهما أخطأ
هي مش هتعاقبه
ففي حال سفر الأب مثلا يبقي الطفل الذي لم يبقي طفلا
بلا رادع
و أفعاله مافيش حد يراقبها
حتي وان راقبت الأم فهو الآن يدرك تماما أنه لا عقاب
ثانيا: إن الأب في الحالة دي بيتحول الي "بعبع" للطفل
يبدأ الطفل يخاف جدا من والده
و يكره الوقت اللي بيدخل فيه البيت
ويتمني لو يبعد عنه
ده غير انه في الوقت اللي الطفل ده هيحتاج صداقة والده
هيكون فيه حاجز كبيييير جدا وجد بينهم
وده طبعا هيؤدي الي استحالة وجود الصداقة بينهم
بعكس لو كانت الأم لها دور حقيقي في مراقبة ابنها
و مكافأته علي الجيد منها
و عقابه أو حتي توبيخه علي السئ
أم سلبية
ودي بقي الأم اللي حتي مش بتهدد بالأب
دي مالهاش أي رد فعل
ممكن ماحدش يصدق انه فيه أم كده
لكن بجد موجودة
لدرجة انه فيه أم بتسيب ولادها يضربوا في بعض
و تنزل من البيت
واللي يغيظ انها بتضحك وتقول ايه
"برجع البيت ألاقي وشهم كله دم و مخربشين بعض لدرجة انهم دايما وشهم متشوه"
حاجة غريب جدا
لكن للأسف موجودة
أو أم تانية جايلها ابنها من برا عامل مصيبة
وأول ماتشوفه تقوله
"يا غلطان"
أم لسلعة
ودي بقي الأم اللي بتربي بنتها كأنها بتربي خروف العيد
بتزرع في بنتها ان مستقبلها كله متوقف علي الزواج
وانها مش هتتزوج لو اتحجبت
دي بقي اللي بتقدم بنتها بايدها للنار
والطريقة معرفة طبعا
أم منقادة
أم مالهاش رأي
والرأي كله لابنها (الولد) والكل لازم يسمع كلام سعادة البيه الأستاذ
وهي قبل الكل
مرة واحدة والدها راح يعزمها علي العشا
قالتله هتسال ابنها
ولما ابنها(قصدي المفعوص) ماوافقش ماقبلتش دعوة والدها
علي فكرة ابنها كان سنه 5 سنين
أم مهملة
الوصف الدقيق لها ليس أنها مهملة
ولكن من الكلام هيوضح ايه الوصف الحقيقي
أذكر ثلاث مواقف لهذا النوع
الأول
في المستشفي وقت حملة تطعيم
دخلت المكان واحدة في منتهي الشياكة
و ضاربة علبة ألوان في وشها عملاه ستين لون
و الربع حجاب بتاعها لفاه لفة محترمة
دخلت بابنها ياخد حقنة التطعيم
أول لما كشفت الولد
أوووووووووووووف
ريحة الولد فظيييييييعة
و شكله بجد يقطع القلب
تقريبا مالمسش المية من يوم ما اتولد
أول لما الممرضة شافت الولد
اتخانقت معاها و سمعتها كلام صعب جدا
واضح طبع من اللي عملاه في نفسها انه عندها وقت وامكانيات
طيب ليه الولد كده؟
الموقف التاني
كنا في يوم خارجين و ركبنا المواصلات
جت واحدة معاها ولدين وبنت
هي ماتفرقش كتير عن الأم في الموقف الأول
وكمان ولادها ما يفرقوش كتير عن الابن الأول
بنتها لبسها فظيييييييييع و شعرها فيه عش دبابير
والولاد حالتهم صعبة
ماحدش كان طايقهم طول الطريق بصراحة
الموقف التالت
في عيادة دكتور أطفال
أمي أخدت بنت أختي وراحت للدكتور
لقت الست اللي قبلها معاها تلات ولاد
الفرق بين كل واحد والتاني تقريبا سنة
والتلاتة تعبانبن جدا
لكن شكلهم لا يحتمل
تقريبا ماعدتش عليهم كلمة نظافة قبل كده
أمي قلقت جدا وحاولت تدخل قبلهم
لكن ماكانش ينفع لانهم حجزوا الأول
دخلت الأم دي و وولادها للدكتور
وأول ما دخلت علا صوت الدكتور وبهدلها
وبعد شوية خلصوا كشف و خرجوا
طلب الدكتور الممرضة
و فتح كل شبابيك العيادة
و شغل المراوح و طهر ايده وسرير الكشف
و فضل متنرفز حوالي نص ساعة
ولكم أن تتخيلوا حالة هؤلاء المساكين
المظلومين في أمهم
بالطبع البساطة و قلة الامكانيات ليست مبررا أبدا
ولا ايه؟
لا أعتقد أن كل أم من هؤلاء لها القدرة علي تريبة جيل مسلم
قوي الشخصية - ايجابي - قوي البنية
أو حتي تربية أمهات صالحات
اذا كانت الأم حقا مدرسة
فليس عليها أن تتأثر بفساد التعليم
16 comments:
والله معاكي حق شكرا لطرح الموضوع
تقبلي مروري
ومدونه رائعه انا حطيتها في المفضله
السلام عليكم ...تعرفي كلامك جي في وقت حرج جداا ..في وقت كل ام ملهاش دعوة ببنتها (اصل هيه واثقه فيها)ايوة ملهاش دعوة بيها لاتعرف اصحابها ولا اسرارها ..ولا حتى يريت بتوعيها بالمخاطر اللي ممكن تحصلها في الحياة
وده كله ادى الى انتشار الجريمة ..بجد وادى كمان الى انتشار والعياذ بالله ..الزنى والاغتصاب و....حجااات كتيرة قوي
الامثله اللي ذكرتيها فعلا موجوده بس الام اللي ملهاش دعوة ببنتها بذات اكتر من الولد ..او بمعنى اصح الام مش صاحبة بنتها ....الام دية فعلا مبقتش موجوده كتييير
وبقوا البنات بيروحو لصحباتهم يشتكو لهم وهيه صحبتها اصلا عاوزة اللي تشتكيله
في الاخر احب اقلك ابدعتي ووفقتي
كلام حضرتك مظبوط جدا
و رأيى الشخصى إن المفروض كنتى تضيفى أنماط شخصيه الامهات اللآتى
" يارب تكون اللآتى نحويا صح ..!!. "
من المفروض عليهن تخريج جيل النصر
ولا إيه ؟
تدوينة في غاية الاهميه فعلا
والعجيب ان الكثير من الفقهاء كانت امهاتهم هم الدافع لهم للوصول لتلك المكانه
امثال ابوحنيفة واحمد رحمهم الله
والكثير
وما وصل بيت شعر في عصرنا الحديث كماوصل بيت حافظ ابراهيم في مكانته
الام مدرسة اذا اعدتها ..اعدت شعبا طيب الاعراق
وجزاكم الله كل خير
ما شاء الله
بوست جامد ومهم جداااااااا
تحليلك رائع ماشاء الله
ربنا يرزقنا القيام بواجبنا على اكمل وجه
ذكرتيني هنا بدورنا نحن في التوعية بأهمية حسن التربية والاهتمام بها واعطائها حقها
تقبل الله منكم ومنا
السلام عليكم ورحمة الله
أخت مسلمه
فعلا كلام حضرتك مظبوط
وأتمنى ان توعى كل هذه الأمهات ليعرفن طريقة التربيه الصحيحه
ولكن ازاى؟؟؟؟
ممكن نسال الحكومه
دمتى بخير
بالظبط الكلام ده كله موجود 100% فى امهات كده بالظبط
لكن فيه نوع من الامهات مثل
أم نضال
زوروها على مدونتى
شكرا ليكى يا اختى على طرح هذا الموضوع و فعلا دلوقتى بقى فيه من الامهات ديه كتييير اوى
بس ممكن يكونو محتاجين مثلا توجيه او كده
و جزا الله خيرا و المدونة جميله جدا ما شاء الله
اعتزلت التدوين
شكرا انكم قبلتوني في عالمكم الفتره
دي
ويشهد الله كم احببتكم فيه
اختى الفاضلة
المرأه هي نصف المجتمع
وهي من تربي النصف الاخر
فاذاً هي المجتمع كله
وكما قيل الام مدرسة
ان اعدتها اعددت شعباً طيب الاعراق
السلام عليكم ورحمة الله وبركاته
حبيبتي اخت مسلمة ..
أين أنتِ ..؟؟
لعل مانع تواجدكِ خيراً إن شاء الله تعالي ...
بوركتِ غاليتي
بجد كلامك جميل جدا ومهم فى نفس الوقت عشان كدة لازم نهتم جدا بتربية البنات عشان تكون فى المستقبل ام صالحة وكلمة لاى بنت لازم قبل ما تخدى خطوة الزواج والانجاب تفكرى كويس لان دى مسؤلية كبيرة ولازم تكونى قدها عشان تطلعى صلاح الدين إلى ان شاء اللة يحرر القدس ويرجع للاسلام مجدة. ولا تنسوا زيارة مدونتنا المتواضعة
الامهات وتربيه الابناء
لما جيت السويد وشفت الامهات ازاى بيتعملوا مع ابنائهم وازاى بيربوهم بجد كنت هتجنن
تلاقى الام ماشيه معاها ابنها فاجأه الولد يروح يتشعلأ فى خشب بتاع صور جنينه مثلا
الام تعمل ايه
تقف تستناه وتتكلم معاه عادى جدا لغايه لما يزهأ ويرجع يمشى معاها تانى
بتهيألى فى مصر لوحصل الموضوع ده
الام هتنادى على الولد
اخلص تعالى هنا مش فاضيين يالا
لو ماجاش هتديله مليون صرمه
بجد الامهات فى مصر بصمجية تربيه
فين حضرتك
مستتينين بوستات حضرتك
صحيح بس انتى نسيتى تذكرى الامهات اللى على النقيد
انا اعرف ام شخصيتهاقوية جدا وفى نفس الوقت اولادها بيحبوها اكثر من ابوهم السلبى..لانها تؤثر فيهم وامثال هؤلاء النساء اللاتى تحققن المعادلة الصعبة..ارفع قبعتى وانحنى احتراما لهم
حسن حنفي
اهلا بيك في اي وقت
جزاكم الله خيرا علي وضع هذه المدونة المتواضعة في المفضلة
------------
سارة
وعليكم السلام ورحمة الله وبركاته
كلامك صح جدا
نفع الله بك
جزاكم الله خيرا
----------
أخ جمعاوي
حضرتك عندك حق
بس املوضوع فعلا استفزني جدل لانه زاد عن حده
واكيد لما نعرف الانماط دي هيوضح النقيض
مرور كريم
جزاكم الله خيرا
--------------
الفاتح الجعفري
كلام مظبوط
جزاكم الله خيرا
شرفتنا
لا حرمنا الله تعليقاتكم القيمة
------------
نووووووووووووور
مرورك أجمد وكلماتك اروع يا عسل
ياختي خلصي الكلية الأول
مستعجلة ع التربية ليه؟
ههههههههههههه
اللهم آمين
ومنكِ حبيبتي
--------------
التلميذة النجيبة
يااااااااااااااادي النوووووووووور
والله منورة المدونة والمدونات المجاورة
ايه ايه ايه؟
حضرتك؟
من امتي يا ختي؟
دا احنا دافنينه سوا
بس لما اشوفك
قال حضرتك قال
حكومة ايه؟
الحكومة نفسها عاوزة تتربي
وأنتِ حبيبتي
ابقي تعالي كل يوم
--------------
أخ عبد الله
أم نضال
نموذج مثالي للأم
ربنا يجعله في ميزان حسناتها و ميزان حسناتكم
---------
خديجة
أهلا بيكي حبيبتي
المدونة نورت
نسأل الله العفو والعافية
مرورك أجمل
أسعدتيني بالزيارة
------------
حسن حنفي
ليه بس كده؟
ماحدش بيقدر يعتزله
في انتظار عوتكم مرة أخري
----------------
الجمعاوي الأصيل
جزاكم الله خيرا علي الاضافة القيمة
نورت
---------
سميتي
بخير يا قلبي الحمد لله
اديني رجعت والغلاسة رجعت
عاجبك كده؟
----------
همسة
يا هلا بيكي
شرفتي حبيبتي
كلامك جميل جدا طبعا
ربنا يكرمك
----------
اخواني مخربش
اهلا بحضرتك
حضرتك من زمان مازرتش المدونة
حضرتك نورتنا والله
لكن
مش عارفة ايه وجه المقارنة
بس اللي عرفاه كويس انه امهاتنا مش بصمجية تربية ولا حاجة
اللي بتكلم عنهم صح موجودين
لكن مش كل امهاتنا كده
واستطيع ان اؤكد انه امهاتنا مربيات فاضلات بالفطرة
المشكلة في المقارنات الظالمة
اللي بعض الناس انساقت وراها
ولو كانوا امهات السويد مربيات فعلا
وبيعلموا اولادهم صح
ماكانتش اكبر نسبة انتحار في العالم تكون في السويد
الأصل ان الام بتربي حامل رسالة
وده اللي انا باكد عليه
جزاكم الله خيرا علي الزيارة والتعليق
أسعدتنا بالزيارة
-----------
حسااااااااااااام
يا ويلكام
اديني جيت
يارب كمان شوية ما تقوليش زهقنا
----------
بنت سيناء
يمكن ربنا يوفقني واقدر اكتب ان شاء الله عن النقيض
دعواتك
مثل هذه الأم
صانعات الرجال و الاستشهاديين
نسال الله ان نكون منهن
نورتي يا حبيبتي
Post a Comment