المطبخ

ياله من مكان كئيب!!!؟

المطبخ والأجازة

بالطبع العلاقة بينهما وثيقة , زواج لا يصلح معه طلاق ولا خلع و لا تمرد

ده طبعا بالنسبة للأخوات , أما بالنسبة للأخوة الوضع مختلف

وده سبب أدعي للحقد الأخوي

يعني بناخد الأجازة علشان نقضيها في المطبخ

لازم قبل ما أتخرج من الكلية أتخرج من مدرسة تيتة الأول

في الوقت ده بتكون المذاكرة اجمل شئ في الوجود

وحقيقي بتمني لو كانت المذاكرة موجودة الوقتي

ممكن أذاكر صح , لكن ده مش هيخلصني من المطبخ طبعا

ما أجمل أيام الإمتحانات!!؟

مع إننا أيام الإمتحانات بنكون زهقانين منها وكارهينها

لكن سبحان الله , ماحدش راضي عن حاله

كمان المطبخ صورة حية للروتين اليومي اللي بنعيشه

كل حاجة في حياتنا روتينية جدا

وخاصة في الأجازة

يعني بنصحي من النوم نجهز الفطار و نبدأ في الغدا

وقت مقتطع في المسجد مثلا

وبعدين العشا

حاجة تزهق , مافيش جديد

و لو حاولنا حتي نجدد

هنجدد امتي؟؟؟؟؟؟؟؟؟

الكلمة اللي دايما تتقال

" خلصي واعملي اللي انتي عاوزاه"

امتي؟؟؟؟؟؟؟؟؟؟

المطبخ ده أكبر مضيعة للوقت

لو حسبناها هنلاقي انه متوسط الساعات اللي بتقضيها الأخت في المطبخ كل يوم 6 ساعات

يعني حوالي ربع عمرها بتقضيه في المكان الممل ده

يعني لو هتعيش 60 سنة

هتقضي منهم 15 سنة في المطبخ

ده المتوسط طبعا فيه حاجات ممكن تاخد وقت أكبر من كده

مش عارفة ليه بنضيع وقتنا في الأكل

ناس كتير بتقول بناكل حتي نعيش لا نعيش لنأكل

مع ان الواقع غير كده

لكن المطبخ هو صورة أخري

للسعي الدؤوب وراء متع الدنيا

بتعب جدا علي بال ما نوصلها وممكن نتعب أكتر بعدها

لكن مش بنمل أبدا من طلبها

يعني مثلا علشان أعمل بيتزا

بتاخد حوالي 6-7 ساعات ده لأن التتار في بيتنا الوقتي

يعني المتوسط هعمل 10

في الوقت ده كله

علي بال ما بخلص بتكون اتنسفت والحمد لله

ومع آخر واحدة وبقفل الفرن

نظرة خاطفة ع الحوض , 10 صواني و 60 طبق

غير الأدوات اللي استعملتها أصلا

أفضل أغسل فيهم ساعة

وفي الآخر؟؟؟؟؟؟؟؟؟؟؟؟؟

ولا حاجة

وقت و جهد ضاعوا ع الفاضي

كذلك هي متع الدنيا

تعب قبل وبعد

من أجل شئ زهيد جدا لازم هينتهي

وبالرغم من ادراكنا للامر الا اننا ما زلنا نلهث خلفها

فيها ايه لو الناس تبطل تاكل وتريحنا

؟؟؟؟؟؟؟

مش هيموتوا يعني

القليل يكفي

بس تقول لمين؟ومين يفهم؟

لازم نقضي ربع حياتنا في المطبخ

لكن في الآخر يبقي الحال علي ماهو عليه

أنا لو قدرت أتكلم هنا

مااقدرش أقول كلمة من دي لأمي

يا إما هضطر اسمع كلام من قيبل

بنات آخر زمن

انتو اصلا مافيش في دماغكم بيت ولا مطبخ

عاوزين تفضلوا بره البيت دايما

اتعلموا تقعدوا في البيت بقي

احنا كنا عيال وبنعمل كل حاجة

خليكي انتي عاشة ع الشيبسي و البطاطس خليهم ينفعوكي

ده كلام أمي

وما أدراكم ما كلام تيتة

ربنا يجعل كلامنا خفيف عليها

كتير أوي الإنسان بيعمل حاجات مش بيحبها

بس الغريب انه بيعملها كويس جدا لانه اتعلمها

صحيح اتعلمها بالإكراه

بس مادام بيعرف يبقي لازم يعمل

والا

....................

والغريب أن يطلب منك أن تحب ذلك الشئ

وكأنه مصيرك الأوحد الذي لا فرار منه

بس برضه

بكرهه